唔使緊張!詳細講你知催生過程係點!

我明早入院催生啦…想問下有無媽咪知道過程會係點樣?

肥千意見:
入到去,CHECK INFORMATION
再檢查,之後就會換衫留小便
OK既就等醫生黎再檢查下你宮頸成唔成熟,再決定同你塞藥定吊藥催生,通常吊藥都係宮頸較為成熟先用,如果宮頸完全未OK既就塞藥
之後就係等啦,等到有反應
同埋開左度數之後,都會幫你種黃豆,同埋吊催生藥加快產程

塞藥會有3次機會 3次都唔得就要開刀

記住食早餐先入醫院
帶少少乾糧、有飲管水杯,方便瞓喺度飲水
(因如果你開左度數,佢應該會幫你人工穿水,唔可以落床…)
帶護墊,因為塞左D藥一段時間之後,會流返出黎…會整污糟底底
帶D可以做紀錄嘅野,記低你痛嘅時間,長度同次數,以免姑娘問起時口啞啞

tinkey發問:
因為本人將於晚上入院塞藥催生,請問老公是否待我推入產房時才開始陪產?

肥千意見:
唔知其他醫院係咪咁做,我係聯合生
姑娘喺我開左一度,準備人工穿水前,就叫我打電話比老公叫佢黎,係房出面等(我係第2朝先開左一度)
我開左3度,就挺落產房,老公就同一時間一齊落去
不過落到去,我老公都係產房個客廳等,等check好哂,駁好機,ready哂先比老公入黎陪我陣痛…

同埋多數醫院都係睇當時產房咩情況再決定比唔比老公入
祝你順利呀~ 記住帶齊野~

tinkey追問:
請問你由塞藥到開咗一度要幾耐時間? 因為我將於晚上8:30才入院塞藥,唔知一般係咪要到第二天才開子宮口及陣痛? 如果老公嗰晚陪我入院,係咪要等第二天/再通知先陪產? 請問你老公用了幾耐時間陪產?

肥千意見:
我day1 嘅9點幾塞藥,到下午1點幾有反應,開始痛,到半夜12點都係keep住不規律咁痛,有時5mins一次,有時痛都唔痛。

到day2 8點幾醫生巡房一check,就話我開左一度啦,叫我ready人工穿水,去埋個toilet仲見埋紅(應該係醫生整到我見紅),就叫我打電話叫老公黎 (佢1個鐘內黎左喺出面等),10點幾幫我穿水+吊藥,就開始痛,但ok既,因為穿左水唔比落床。
到左下午點幾2點check發現開左3度,落得產房,
之後我老公都大部份時間陪住我 (除左檢查開左幾多度,要行開之外)
2點幾陪到我8:26分生,佢再喺產房出面等到我聯好哂針無出血可以上房 (已經10pm,即係total12個鐘)

個個產婦反應都唔同架~
我嗰日入去,我係中間床,左右2個都係催生,我右手邊嗰個day1 6pm已經見bb個頭;左手邊嗰個一直都唔痛唔盛,仲諗住我快過佢啦,點知day1夜晚12點幾佢痛到嘔 (真嘔,同埋佢無人教佢呼吸辛苦到傻左),之後佢第二日9點幾落去產房,11點幾就生左…勁快!
我就最遲嗰個,仲生左勁耐……

tinkey追問:
你記得咁清楚D時間,係咪有記錄低? 想問入產房時,除咗自己同老公外,仲有冇其他野要帶入去? 我真係好怕痛同緊張,希望到時可以順利生產啦!

肥千意見:
係呀,我帶左ipod去聽歌,醒起有野可以drop note,咪記哂d時間囉~ 哈哈~
落得產房時,會有嬸嬸/姑娘幫你執埋你個走佬袋落去~ 唔會要你拎~
所以你入到院,唔好拎哂d野出黎,否則有排執同埋比人鬧! 最好個袋原封不動

我都好怕架…其實
但落到去,你都無得走同返轉頭,頂硬上啦~ 同埋陣痛呢…又唔係真係”痛”嘅感覺…似係忍住唔好屙屎嗰種感覺多d…
記住唔好大嗌,留返力去生
到姑娘叫你用力屙,就下巴掂住心口,忍住唔好嗌,忍住唔好張大口,用力(屙屎咁樣嘅力)去屙,姑娘叫你用力屙10秒,你就盡你能力屙得幾耐得幾耐!

p.s. 因為我之前陣痛勁嗌…搞到無咩力生,我屙左成個鐘…搞到bb同我發燒,bb無得跟身,所以忍到既,真係唔好嗌,咬老公算啦!

同埋最緊要(盡量)聽佢哋講!

肥千補充:
見到好多人都問催生係點,個個都覺得催生好痛,其實唔同既只不過係塞左粒藥。自然作動嗰d (見紅穿水) 其實都會吊藥催生…其實痛呀嗰d全部一樣。

其實催生一d都唔驚~
我個人感覺催生好似仲好d…所有野都叫做醫生控制範圍…
我哋討論區6月有個媽媽 (我知你哋唔介意我講既)
自己開左一度…但一直都唔開…又痛又乜咁…結果最後發燒開刀
希望我既分享幫你快d生個b出黎啦到時

Facebook Comments
廣告