我個BB得14日大
前幾日發燒…送左去醫院
驗到有尿道炎,3個月之後佢要做一些test驗尿道
要插入尿喉,因為有風險,所以要家長簽名
我真係好擔心,好似驗又驚整親佢,唔驗又唔安心
想請問一下,有無人試過?

123sillyboy123意見:
醫生係醫學上認為孩子係唔應該有尿道炎﹐如果有尿道炎﹐必需找出原因。 所以一般都係會做膀胱造影既檢查。有些較細既嬰兒﹐甚至需要入院作靜脈注射抗生素﹐以防細菌流入血液。
造影係必需﹐因為要找出孩子尿道結構有否問題﹐如尿液倒流。

當孩子做檢查時﹐會因不適而反抗﹐喊﹐叫﹐所以最好方法係﹐忍心點交由醫生處理﹐自己別在場。對你對BB對醫生都好好多。

別太擔心﹐按照醫生既指引進行檢查找出尿道炎既原因吧。

笨蛋Faye追問:
咁我想問下…呢個檢查係咪一定要做?
因為我好驚會整親個BB…
我自己生果陣都比人放過尿
真係好痛

123sillyboy123補充:
以我所知﹐孩子有尿道炎係需要膀胱造影﹐觀察液體流向﹐確定尿道有否倒流問題。如果尿道結構有問題﹐尿液倒流會引致尿道炎。我認為14日大既初生嬰兒有尿道炎的話﹐應該及早跟從醫生既指引作出檢查找出或排除結構上既問題。
另外﹐醫生應該有俾抗生素你BB一直服用到檢查後吧﹖藥要依時服用﹐緊記哦。
我既答覆你只可視作參考﹐如有醫學上既疑問﹐永遠醫生既意見係最可靠的。

笨蛋Faye追問:
.BB依家仲係醫院
打抗生素…星期一出院
會唔會比藥我返屋企用我就唔知喇…
不過排左期,7月先去做膀胱造影
我屋企人叫我睇下呢幾個月有無再係咁先
如果無,叫我唔好比BB做
話因為始終有風險同埋佢咁細個
我個心都十五十六
唔做又驚唔知佢咩事,做又驚會出事

123sillyboy123補充:
依家係醫院靜脈注射抗生素﹖ 咁就唔使驚。
BB三個月大時造唔造影最終決定權係你地到﹐但我可以講既係﹐越大個造影對BB黎講就越辛苦。
我未聽過人做膀胱造影而出現問題﹐或者﹐你待BB出院後﹐可找一名兒科專科醫生查詢。 到時問問佢膀胱造影有否必要吧。