有關坐月沖涼洗頭

D人話坐月要用薑水洗頭同沖涼…咁即係點呀?係咪同平時沖涼洗頭一樣要用淋浴露同洗頭水…之後用薑水代替水沖乾淨?定還是咩都唔洗用…直接用薑水沖身?d薑皮水可唔可以溝水架?同埋要沖幾多日呢?

babylow意見:
當年…我就係直接用薑水沖洗, 之後在用溫水沖一次,(個人覺得唔用溫水沖一次, 個身有陣薑味怪怪地)我先生嗰陣係整走薑皮….我當年有溝水….因為唔溝水會好熱,不過我只係溝少少…多數等佢自然凍D先沖涼,我當年沖12朝無沖啦…因為真係唔想在沖落去,其實睇返你個人想點…無話特別要點做,最重要你奶奶/ 媽媽嗰邊係習慣點洗有時唔專重老人家說法, 自己有排煩……

miuling814意見:
我奶奶同我阿媽就無呢D思想…同埋醫生話就算平時咁沖涼都係無問題…所以我生完之後既第二晚, 已經好似平時咁沖涼,無話特別用D薑水之類的…

undisclosed意見:
我宜家坐緊月,阿媽唔比我洗頭,沖涼就日日煲薑水,唔可以溝凍水(即係生水),會攤涼d黎冲,除左洗會陰傷口之外,我沒有加沐浴露

candyloveluffy意見:
我生第一胎時都係用薑水沖, 冇用沐浴露同溫水沖返D薑味,其實D味一陣就散, 唔會真係搞到幾日都有薑味喺身度嘅~

csonbig意見:
一定要用煲過既水, 刷牙洗面都要用「熟水」,有薑皮就加薑皮煲水, 再用黎洗頭, 洗完一定要吹乾,呢D唔係吹水, 係堅, 入左風就成世架啦!

sycheung意見:
我生完第一個月只沖過兩次涼…分別為第20日及30日,用薑皮加米酒煲水來沖涼及洗頭….有用沐浴露及洗頭水

shilingfa意見:
我生完後, 喺醫院嗰兩晚都冇沖涼洗頭, 出院嗰晚就已經沖涼同洗頭,媽咪一早幫我預備哂d薑水, 煲到滾哂再攤涼少少, 之後先黎沖涼+洗頭,沖完之後會即刻出一身汗 (媽咪話係好事, 即係去哂d風)12朝之後, 就好似平時咁沖涼洗頭,平時洗手就一定要用暖水洗, 我五姑奶佢就係唔信哩d野, 貪方便用凍水洗, 依家搞到右手手腕同手指完全郁唔到, 醫生仲話可能有需要做手術

蠢散一名意見:
同意一入左風就成世架啦!我媽咪依家四十幾, 但已經成日周身痛, 中醫同佢講係「坐月風」喎,跟住我媽咪諗番自己之前坐月真係有D保養功夫冇做好呀!所以佢依家都同我家姐講, 女人坐月係要好好保養, 唔係第日有排你受呀!

Facebook Comments
廣告