成日唔係好夠氣力, 有咩方法可以令自己生bb時夠氣生?

未懷孕前已經唔係好夠氣,如:跑一陣已經喘晒氣、唔夠氣去廁所大大咁,懷孕時, 有咩方法可以令自己生bb時可以夠氣生佢出黎﹖行多d﹖ 食多d﹖定係有其他方法﹖


solomandy意見:
陣痛時 , 唔好大叫大嗌 , 留返D氣生BB , 仲有記得生之前一定要食飽D……我個時一路陣痛一路食飯添!其實個肚越大, 就越唔夠氣架啦~放心啦 , 有信心自己可以有力生BB就得架啦, 比D信心自己


yukoyuko意見:
其實食左野先去都冇用, 我生嗰陣都食埋野先去醫院,但係去左醫院個零鐘已經嘔晒所有野返出黎,而且入左待產房就禁食, 只可以飲水or冇渣果汁,到中午我飲左d提子汁, 結果到我入左產房生得嗰時又嘔返晒出黎!嗰陣覺得自己唔得啦, 冇晒力生唔到架喇!但係為左bb…….頂硬上博埋條命!終於都比我生到佢出黎, 生完見到佢即時充滿力量鬼打咁精神,結果上左產後房我都食唔到野落肚, 因為個肚空左成日唔習慣,到第二朝先食得返~ 但我產後好精神~ 一諗到阿b就勁開心!


cindycindycindy意見:
我由有咗五個星期開始就每個星期六日都同老公出街,一行就行6-7個鐘, 直到生之前一個星期先無咁做,諗住行多D易生D, 又可以夠氣D,點知我痛咗14個鐘先開到10度生個仔, 最後因痛得太耐無晒力, 所以要吸出黎囉,所以樓主唔駛咁緊張, 你依家咪盡量行多D囉, 量力而為啦,因到生時都唔知係點, 不過多運動點都好過無動運嘅


kikilove1102意見:
所以我諗其實行多d係咪無幫助架?我有左個時唔多郁,臨生之前嗰個月直情街都出唔到,因為太重喇,行路勁痛,但我痛左五幾鐘就生左出黎喇,不過我生之前都無叫過,死忍住,生嗰一刻只係諗住個個女人都得我都一定得,唔用力只會更痛,bb又會有危險,一分鐘唔洗就生左出黎喇!樓主唔駛咁擔心呀,因為我都係跑兩步己經喘哂氣嘅人黎,我又勁少運動,平時只係坐係部電腦前面,個個都話我生嗰時你就知死,結果我生得好輕鬆丫,放鬆d就得架喇!


alice@@意見:
臨生前2個月開始, 每日行30MIN & 2層樓梯…不過最緊要就係陣痛嗰陣, 千祈唔好痛就大叫…嘗試下放鬆, 就算痛緊都要放鬆, 雖然係好難, 但係都要做,我嗰陣陣痛時扮哂冇事發生過咁, 其實內裡真係好痛!D姑娘仲以為我暈左…最後我用力屙左阿女兩下就出左黎喇…其實放鬆個人, 子宮開既度數會比緊張時快好多…


car680意見:
懷孕時行多D真係幾好架,唔單只令下身有運動到生嗰時會快D易D,而且做慣運動回氣都會順暢D,我就間唔中行返屋企或者行返公司時會兜路行迫自己行多D,而且每晚臨瞓前都會響床上面做D產前運動,我諗都真係有幫助嘅。因為我由1度都未開直至開到9度都係用咗1-2個鐘,之後護士就比我試生,PUSH咗半個鐘都無就見到BB個頭仔去到未宮口,之後一用力就生咗BB出嚟喇,都係用咗3-5分鐘,SO GOOD!


chiliwu意見:
我都唔係行好多咋, 放產假先開始行, 每日行粒幾鐘, 行左五日, 第六日冇行, 第七日就生得喇!痛嘅時候千祈唔好浪費氣力死嗌爛嗌,我冇嗌過, 多數都係陰聲細氣咁講「好痛呀…」到用力生嘅時候, 都唔好發出聲音,助產士教, 吸氣, 閉氣10秒, 之後用力推個 bb 出黎, 記得用力嗰陣唔好發出聲音, 用力嗰下係好似做 sit-up 咁, 個身要係向上升高, 個力向下推,我都係用左幾分鐘就生左 bb 出黎喇!隔離房個媽媽, 就係用晒 d 力黎嗌, 結果生左粒幾鐘, 辛苦晒…

Facebook Comments Box