啱啱滿月BB瞓得勁少

睇書同聽醫生講都話初生BB一日大概瞓18-20個鐘,

多數飲完奶就瞓, 瞓醒已經係下一次飲奶既時候……

但係我個仔由出世到宜家都瞓得唔多, 一日最多可以瞓到12個鐘, 平時多數都係瞓8-10個鐘。 好似琴日到宜家, 佢琴晚11點瞓, 夜晚起左兩次身, 最後朝早7點到醒曬, 一直玩到今晚9點鐘, 中段頂盡係小休5-10分鐘, 9點飲完餐奶之後瞓到2:30又唔肯再瞓返…

最慘既係佢好扭抱, 只係飲完奶之後嗰半個鐘係可以自己瞓, 喺佢見到你既地方度自己玩下而唔喊, 其餘時間都差不多要人抱住先唔喊, 我已經跟佢瞓覺時間一齊瞓…… 但係就連我自己都唔夠瞓, 佢又點會夠瞓呀? 好擔心佢成日瞓咁少個身體會無咁好呀, 有無咩解決方法?

aoisonic意見:
之前我哋一直由得佢扭, 由佢哭, 佢累就自己會瞓了…不過睇你忍唔忍心

macvn123意見:
我BB初生果時每月只瞓得6-7個鐘,我又攰,佢唔瞓我又冇得瞓,果陣真係癲癲地.
之後約2個月開始慢慢瞓得多左,一日加埋都有10-12個鐘,已經比初生嗰時好好多, 你唔好咁擔心喇, 當BB適應左環境後就會好好多.

我BB都係勁扭抱, 我諗好多BB都係咁, 一係你由得佢喊, 等佢喊到攰收聲自己瞓, 如果唔忍心, 咪好似我咁抱住佢瞓, 但我建議抱住瞓最多可以抱2-3個月, 之後要訓練BB自己瞓, 唔係佢將來好難自己瞓覺

Snowb意見:
我BB頭個1-2個月都係咁, 成日要我抱, 放都放唔低, 一抱佢就肯訓囉!
我試過狠心, 由得佢喊, 個衰女真係可以喊足2個鐘…
中間累瞓返五分鐘醒左又喊過…忟得濟搞到面仔生曬粒粒…
之後我唔同佢鬥啦, 佢鍾意抱就抱佢啦…
唉… 一日抱左我十幾個鐘, 真係人都癲…

之後, BB 3個月左右開始好D喇…
可以自己係床仔眼光光但唔喊…
記住呢D時候就要由得佢自己一個人, 唔好抱…
慢慢…佢可以自己一個人既時間就愈來愈多, 無啱啱出世個陣咁扭架喇…
而家我BB4個月, 可以有陣時喊緊, 我放低佢反而收聲架…

你要加油呀, 呢D係必經階段…
我相信好多初生BABY都係咁, 係有少數好湊就成日瞓…
個陣我好傻, 我成日諗埋一邊…覺得嗰段日子好難過…

究竟BB幾時先大架? 係咪以後都扭計?…答案係 唔係架! 呢段日子撐過左就OK!
最緊要BB瞓個陣, 你都要瞓, 咁你先會有精神!

Yanmi_T意見:
會唔會係無咩安全感呢? 我仔仔出世頭果幾個月,
我都有用被仔輕輕包實佢, 佢都算瞓得多, 醒左都肯係床仔度唔喊, 可以試下

小黃豆意見:
其實我個仔都係咁,因為食奶食得好密,又唔夠安全感,你試下包實BB黎瞓。BB到左兩三個月戒左夜奶,就會好瞓好多了。

Facebook Comments Box