結婚前發現有左BB, 結婚嗰日可唔可以跪長輩斟茶?

我昨天去診所check左有左bb, 但我月尾先結婚, 我聽人講, 我嗰日係唔可以跪係到斟茶俾人飲架, 我亞姐話越老越唔好啊!

其實點解唔可以跪喺到?

 

同埋我未夠3個月又好似唔可話俾人聽, 如我唔跪, 嗰日咪會通天囉!  咁我跪唔跪好呀?

 

katherinemy意見:
你既然講得話有左BB3個月內都唔好同人講住, 咁我相信你地都係一個迷信既人吧? 我無聽過話有左BB唔可以跪人, 但唔可以跪神同唔可以踎低我就聽過…

我覺得你結婚唔跪長輩唔係咁好, 何況都係跪一跪就好快起身, 佢地唔會要你跪一日吧… 你自己小心D, 慢慢跪低慢慢起返身就無事啦, 所以我係你, 我會跪囉!

solomandy意見:
無錯~ 有左BB係唔可以跪 , 嗰時我2哥同佢老婆都係有左而結婚 , 我媽咪話唔駛跪 , 企係度斟茶 , 而且連拜神都唔可以跪 , 我媽咪係D好傳統思想既人….不過你叫你男朋友問下佢父母駛唔駛先啦 , 如果佢地係新派思想 , 你唔跪就有排煩啦~

@star@意見:
問左未來老爺奶奶意見先啦 初初有左唔可以太操勞
我覺得一定要通知雙方家長有左先 咁對方會小心d
特別係家中小朋友走黎走去好容易撞到你個肚 總之任何事情小心為上

bb010212意見:
我有左結婚唔駛跪…我朋友都係

andychw意見:
我女友都有左
我哋都係將會月尾結婚
但無諗過唔跪 跪都係一陣啫

Snowb意見:
我之前結婚… 都係叫我唔好跪…
尤其對年紀較大個d老人家…
因為你有個bb… 怕佢地受唔住… 會早d去咁喎….

anyway… 我都跪左我嫲嫲呀…

CONNIE0219_02意見:
我結婚嗰陣都冇跪~ 其實我想跪架~
只係老人家話唔好~ 話會沖喎~
你問返個老人家意願啫~
如果個老人家唔鍾意你夾硬跪又唔好~
如果個老人家冇所謂既就梗係跪好~
自己小心D~ 老公又扶住就唔怕~

cutenable意見:
你真係要同 4大長老講要唔要跪囉~
好似我咁丫, 我雖然唔係有bb 先結婚,
但我結婚嗰日我哋好多長輩,
先跪, 之後敬茶, hold陣影一影, 之後收利是/禮, 又要影一影相, 之後先起身,
我足足跪左成十幾廿人, 腰又痛腳又痺,
你地睇睇多唔多人要跪囉~
我表姐話, 父母及祖父母嗰d先跪, 其他長輩可以唔跪…
你地問清楚, 你依家有左幾耐, 到時你都要睇返自己身體狀況,
跪都可以, 但起身已暈暈地就要出聲, 唔好死頂, 同埋到時可能你有害喜現象~ 有咩事就要出事休息下~

antibot2意見:
跪係大禮 只需要向父母 奶奶老爺
即你2次 你應該ok的

其他人一律唔跪 你可以話係你鄉下規矩

月巴K意見:
一處鄉村一處例, 我自己就覺得無所謂.
只係跪一跪就即刻起返身, 可以請個姊妹或者伴娘企喺你旁邊扶你就得啦.
我自己都係有左先結婚, 一樣有跪, 乜都做足曬~
自己小心D, 動作慢慢做, 唔好太急應該都冇問題既!
況且都只係跪父母, 最多跪埋祖父母, 最多都係兩次!
如果你真係好唔安心, 咪同你老公既家人商量下,
睇下對方父母點諗囉! 反正都就黎一家人, 有商有量阿!
影子意見:
原來唔少人都係有左先結婚~ 真係估唔到喎~
跪唔跪都只係一種儀式~ 我覺得唔做足又無咩影響~
最緊要係兩邊屋企人都明白~ 而且有曬共識~

頭三個月都幾緊要~ 我覺得你要將 d 儀式化繁為簡~
雖然結婚都係得一日~ 但都係小心 d 好~
唔需要太執著每一個細節~ 其實都係攞個意頭~
同埋儘量搵人幫手搞結婚 d 野~ 減輕自己壓力~

其實唔需要怕俾人知~ 又唔需要大肆宣揚~
同兩邊屋企人講就 ok~ 最多俾班姊妹知~
不過叫佢地唔好同人講住~ 之前都有人提到~
你個 B 出世~ d 人都曉計~ 你係結婚之前已經有左~
問題係有幾多個人記得你幾月結婚~ 知道又會唔會講出口~

vanorang意見:
我結婚嗰時都有跪呀~ 我索性跪左唔起身囉~ 避免每個酙茶起身跪底囉~

Facebook Comments Box