生B一星期,如懷疑自己患上產後抑鬱,可以點做?

唔好意思,內容有點長,請給我意見,謝謝!

(1) 本人是於晚上入院催生,由入院途中因得不到老公關懷及支持(佢話我做咩個走佬袋咁多野,而家唔係叫你去CAMP? 有漏到時先買咪得! 但我心諗,如我叫佢去買,佢一定又鬧我做咩買漏嘢!) 我只是默默流淚,而且仲有諗過唔需要佢來陪產但自己又好驚! 直至步入產房,老公也是急急腳想離開!

(2) 到了第2天,穿了羊水,護士通知可叫老公來陪產,但電話中的他只是叫我如非沒必要,痛也不要亂叫,仲問我咩唔係要成7、8度,就黎生得先開始陪產咩?

(3) 來到陪產,也是漠不關心的樣子,好像不知自己到來的角色!

(4) 到了用力屙阿B時,因聞”笑”氣也沒用,助產士建議打止痛針,但老公示意唔比我打,怕藥物對阿B有影響,後來我真係好痛,見老公佢完全沒有理會我的”痛楚”,助產士叫我自己渣主意,我最終選擇了”打”,但老公沒有支持!

(5) 下午生了阿B,佢即刻出咗去育嬰室睇阿B,剩下我一個係產房等了3個鐘,好肚餓想叫佢攞D餅比我食,打電話比佢又關上手提。到了病房,探病時間有2個鐘,他只是逗留了半小時,就給我一個不耐煩的樣子,說要返屋企!

(6) 問他明晚(即阿B出世第2天)會否來探我同阿B,佢話好忙,如沒必要,他不會來! 而且生了之後,下面傷口好痛,老公一直沒有主動”扶”我!

(7) 因為生阿B時唔夠力,阿B頭頂有隻”計”,奶奶責怪我點解唔用力生,搞成阿B咁? 我受不了啦! 好激動同佢講﹕你估我出到力我唔想出力咩? (我心諗個果係我個仔黎架! 你估我好想佢有事咩?)

(8) 奶奶叫我生完可以”茂低”,子宮唔會因為咁而下垂,唔駛就住就住,而且話我剪會陰的傷口應該很細,唔會好痛(即暗示我扮痛),又問我點解生完個肚仲咁大,要我快D減肚臍,要保持苗條身型即好似佢咁! (我心諗, 唔通身型真係重要過健康?)

(9) 當奶奶知我餵人奶失敗,便嘲笑我﹕都知你唔忍得BUMP奶的痛!

老公而家會通頂湊阿B,知佢好錫阿B,但就完完全全沒有理會及關心我,我知佢好攰,但係咩代表阿B出世後就唔駛理老婆? 係唔係代表我的責任或利用價值已用完,佢可以放棄我? 我真是很不開心,天天流淚….很無助及失望…..
AM_baby意見:
我順產生仔仔已經3個月, 我老公都無入黎陪我生架, 當生嗰時我死頂無聞笑氣同無打針, 試諗吓上一代咩都無都係咁生啦~ 同埋呢度好多媽媽都係咁, 唔好諗咁多啦! BB同媽媽既健康最緊要~

你揀餵人奶比BB好好啊! 但點解會失敗? 係咪BB吸啜方法唔好呀? 媽媽心情唔好都會影響上奶架喎, 多D埋身餵會好D架, 再唔係打去餵人奶嗰D熱線有姑娘幫到你~ 唔好放棄餵人奶~ 你奶奶講咩唔洗理, 到你餵到而BB又健康成長咁到時佢就無野好講啦~ 係咪?

你老公起碼都願意幫手照顧BB, 你有唔開心咪坦白同你老公講, 你有咩需要都要講出黎先得架~ 男人係無女人咁細心架喎, 唔好太上心, 攪到自己咁唔開心啦~ 我生完頭一星期我個人奶BB黃疸成個半月先退, 我嗰時生完第三日開始個個星期抱住BB不停生入健康院同醫院, 真係攰到不得了…..努力加油啦~ 睇住BB健康成長, 遲d你BB識對住你笑就咩辛苦都過哂去囉~
AM_baby意見:
你可以做嘅係專心照顧好BB, 唔好諗太多野, 你帶得BB黎呢個世界就有責任照顧好佢, 唔開心野唔好諗, 搵朋友搵家人傾下偈, 問吓老人家佢地以前點生點湊, 咁你就知我地呢代生仔係舒服好多架~ 你想要幾多回報就睇你點照顧好BB啦~ 努力!
Snowb意見:
首先, 你要直接將你全部感受講俾你老公聽…
講真… 生完嘅女人… 都想丈夫體諒同錫返…
唔好理佢會有咩反應俾你… 講左先… 起碼你表達左你自己嘛!

其次, 出左院之後第二日咪要帶呀B返去健康院既..
個陣姑娘會問你家庭狀況D資料..
你個陣同姑娘講你唔開心.. 點點點點點…
我諗若然佢覺得你係抑鬱.. 佢會同你轉介個D架…

最後.. 你盡量叫自己睇開D..
有咩唔開心.. 就同朋友傾.. 同你媽咪講…再唔係上黎講囉!
呢到D媽媽個個都明白你既感受..
Snowb補充:
唔好咁快話自己餵人奶失敗住…
啱啱生完未咁快上奶住架…
飲下魚湯… 會快上奶D…
仲有唔開心, 少休息既話, 上奶都會慢D… 同埋無咩奶架!

同埋初生BB食奶會食得比較密..
再加上佢地啜得耐… 覺得累又瞓左覺…
所以有時你見佢無食… 以為佢食夠…
佢轉個頭醒左又喊… BB先發現自己個肚仲未飽…
所以一開始個時餵人奶真係身心都好疲累…
之前我都係餵到喊架…
我奶奶都有微言…
最後.. 我都堅持餵左一個月…
[我知道一個月時間係好短… 但因為我要返工… 公司又無地方俾我PUMP奶… 所以我餵左一個月無餵…]
不過咁…堅持到固然係好…
若然你真係餵到好好好唔開心… 就餵奶粉啦..
做你認為舒服既方法.. 生完BB已經好辛苦.. 唔好令到自己咁唔開心..
舒舒服服.. 開開心心咁去湊BB.. 對你對BB都好
思明意見:
1) 佢可能驚你生完bb攰,出院又要抱bb又要拎咁多野辛苦啫

2) 你話佢叫你痛都唔好亂叫,其實都係想你留返d力生bb啫

3) 你話佢好似漠不關心,其實佢自己都可能好驚好緊張(我老公就係咁,入到產房唔知點算好)

4) 如果係我…呢個時候我都未必會打止痛針,因為打完止痛針亞b出世可能呼吸會有問題,雖然有解葯,但都唔想亞b同自己捱多針,因為你都己經開始用力生緊亞b啦嘛,完全可以體諒~我都明白你一定係好痛,先會要求打~

5) 呢點我覺得又未必關你老公事,係院方問題,我唔知你邊間醫院生…我係屯門,老公都有陪產…亞b一出世搞好晒老公就要離開產房,所以我係產房抖果陣都係得自己一個,好彩有助產仕幫我留左份餐同埋教我餵人奶…至於你話佢探病時間半個鐘就走,咁佢都左撲右撲都攰架嘛,佢唔返去抖足精神點去照顧你同bb呢~

6) 佢唔扶你可能怕整到你令你更加痛

7) 唔好理佢講咩,都唔好為左佢一句說話勞氣,傷身呀

8) 我明白你生完個傷口真係會幾痛,同埋聯左針扯住扯住咁都唔舒服,又驚爆線,你唔好理佢~

9) 其實你餵人奶初初儘量埋身,我唔知你係咪有特別原因所以要泵,但唔成功都唔緊要,最緊要你問心無愧,唔好理佢咁多~

總括黎講,我覺得你要同老公講你感受,同埋有時d男人係咁架,你見到ge同你諗ge係兩回事,至於奶奶你就唔好理佢,佢講咪由佢講,身體係你自己,無人比你更加知道你身體ge感受~

放開d,如果真係好唔開心上黎呻下或者下次返健康院同姑娘講下,唔好一個人屈埋屈埋呀,對你同bb都唔好架,bb會感覺到你唔開心架
小貓B意見:
放鬆d啦~
可能你先生唔識點表達自己啫
佢肯湊bb…即係話佢都有心關心你攰唔攰囉…
好多男人都係咁架啦…—>大男人唔識表達自己
所以呢…你都唔好亂諗咁多喇..
你放心比佢幫你湊b…而你自己就好好坐月, 咩都唔好諗
abbychuchu意見:
我之前都覺得自己有
跟住返健康院同姑娘講
佢地好好, 同我傾左好耐
當時我有喊
傾完之後好好多
之後都有轉到社工到 (健康院裡面有社工)
同埋有咩事隨時可以打電話返健康院見姑娘或社工

我發現自己有抑鬱時
好多野都諗埋一邊
放鬆d, 有咩就睇下個b
會開心好多架
philipsmore意見:
看開點吧,冇咩大不了,也冇咩重要得過你個BB
最多當老公和奶奶都係工人來幫手,你只需要他們的協助,不需要他們的愛
有BB的愛就夠了,BB健康就夠了,不要求太多,就不會怨恨太多,也不會甚麼抑鬱
過多半年BB識笑識要你抱時,你就知其他人都只係配角
小黃豆意見:
樓主, 我同你一樣, 生完個幾禮拜, 個情緒真係會比較波動大D, 唔好再一次過諗番D唔開心既野勒, 過去左既無得追番

最重要係你同BB平平安安, 記得要同健康院姑娘講你有唔開心, 要跟進下, 如果你去政府生BB, 你臨出院時應該會有個熱線電話俾你求助, 你懷疑自己有產後抑鬱, 可以打佢地個病房電話的 (我去威爾斯生, 有呢個服務)
tinkey補充:
我今天已到健康院見了姑娘,我也邊說邊哭,姑娘都建議我先同老公傾下和勸佢不要太過緊張阿B(因我老公已幾晚冇瞓看住阿B,怕佢焗親同吐奶”濁”親!) 攪到佢自己都精神緊張,而我就成日喊同有D抑鬱!

好多謝上述各位媽媽的支持及開解! 頭先在阿B床邊見到阿B的笑容,真係好開心,現在我可以做的便是要努力揍阿B為目標!

Facebook Comments Box